أجمل الأفلام إللى إتعرضت قريباً فيلم الاسكندراني
فيلم رائع قصة المبدع الراحل أسامه أنور عكاشه .. فيلم برائحة الزمن الجميل .. إسكندرية وجمالها والأسكندرانية وجمالهم .. صراع بين أصول الماضى الجميل والواقع والحاضر المر.
خالد يوسف مخرج عارف هو عايز إيه ومتمكن جداً من أدواته ومشاهد الأكشن موظفة داخل السياق ببراعة
هتتفق أو هتختلف مع بيومى فؤاد هو عامل دور عالمى وغير من جلده
▪️الفيلم نقطة تحول فى مشوار العوضى الفنى بالإضافة إنه بيشتغل على نفسه وواضح جداً فى الفيلم وهيبقى ليه مكان مهم فى الأكشن الايام اللى جاية
▪️الفيلم لا يحتوى على أى مشاهد عُرى أو ألفاظ خارجه
▪️آداء عالى لكل الممثلين وحضور جميل لكل من حسين فهمى و صلاح عبد الله والبطولة مش بكثرة المشاهد أو الدور الكبير ممكن يبقى مشهد صغير ويعلق معاك طول الفيلم
▪️الفيلم فى المجمل جميل وجديد ويستحق المشاهدة ..
▪️لو رجعنا بقى للناس اللى بتنتقد الفيلم عشان اللى عمله بكر وبنفوذه وبفلوسه طلق اللى كان بيحبها من زوجها فالكلام ده حصل قبل كده كتير فى أفلام متتنسيش
ومن أكبر ممثلين وكُتاب عظماء وعلى سبيل المثال لا الحصر فيلم حافية على جسر الذهب لما عادل أدهم كان عايز ميرفت أمين بالعافيه من حسين فهمى ومحمود ياسين فى مسلسل سوق العصر لما طلق غادة عبد الرازق من جوزها عشان يتجوزها وفيلم الفرن لما عادل ادهم طلق معالى زايد من جوزها وغيرهم.
▪️ومن جمال الجمل اللى إتقالت فى الفيلم ومتتنسيش
*ريحة وطعم إسكندرية مبيتغيروش دول فى جدر الزمن لو غيرت هتغير على الوش بس
خد بالك ياابنى الناس اللى بتشتريهم بالفلوس ولا السلطة هما أول ناس هيحدفوك بالطوب أول ماسلطتك أو فلوسك هيروحوا
▪️من أهم مشاهد الفيلم ركوب العوضى لعربية بورش من أغلى وأجمل وأندر العربيات فى العالم لأنها ضمن الجموعة اللى رسمتها الفنانة التشكيلية العالمية شاليمار شربتلى زوجة المخرج خالد يوسف
وتوضع رسومتها على سيارات البورش فى متحف اللوفر بفرنسا وقالت الفنانة شاليمار إن الرسم على العربية حاجة صعبة جداً لإنها لازم ترسم بألوان دوكو علشان تلزق على العربية والألوان بتنشف كل 3 ثوانى
▪️والمشهد ده بيعبر عن نقطة تحول فى حياة بكر الأسكندرانى من الفقر المضجع والنوم على الرصيف إلى الغنى الفاحش من أسطول عربيات وطيارة خاصة ويخت
▪️نيجى بقى لمفاجأة الفيلم وأغنية أنا وإبنى للمطرب الشعبى عبد الباسط حمودة وكلمات الشاعر الكبير جمال بخيت وألحان شريف حمدان حقيقى أغنية روعة وصوت عبد الباسط فى حتة ثانية والكلمات تحفه
“يخلق من ظهر الحب شيطان
يخلق من ظهر العقل جنان وأنا وإبنى رمينا النار فى الريح ودفنا فى أرض الخوف مصابيح تلاعبنى ياوااااد مهزوم لجريح
محناش زمانين لكن قلبين على نفس النبض ومتفقوووش
أنا فى عينى ملاك وأنت فى عينك الأسى وحوش
تخنق غنوتى تكسر فرحتى وسنينى معاك
تحرق سكتى تقتل دنيتى وأنا روحى فداك
أطعن أيامى إللى فى قلبك وأحلفلك ياابنى إنى بحبك وأموت وياك”
▪️وأخيراً بالتوفيق لكل من شارك فى العمل 👌
